Rom 1 | NAS | STEP | Aung karavoto~ ninge Paulaꞌke daariamang. Ning eeꞌnara Jiisuuꞌ Karistooꞌ bakaang botovotonaaꞌ Kumponinge kara-okomui-nka deemaraaꞌnaang bokumuuꞌnung. Teie simpeꞌmui bamuuꞌ bakaang doorenang tampara tavoꞌkoo.

Romans 1

Masikaꞌantavampiko Deekoꞌ Kumponinge Niiꞌ Koontoꞌnuka Tammuriainaꞌ

(1:1-4:25)

Paulaꞌ Tee Naning Kumponinge Bakaang Kara Oko-antavuuꞌnung

1 Aung karavoto~ ninge Paulaꞌke daariamang. Ning eeꞌnara Jiisuuꞌ Karistooꞌ bakaang botovotonaaꞌ Kumponinge kara-okomui-nka deemaraaꞌnaang bokumuuꞌnung. Teie simpeꞌmui bamuuꞌ bakaang doorenang tampara tavoꞌkoo. 2 Tero urikamuꞌ Kumponinge miruꞌuuꞌ tee aung doorenang tampara teing nakaronuka~ urikupoong biikaang Daari Meekung-koo kuunge. 3 Tee doorenang tampara tee tee eeꞌnara Bauring-koonung; 4 Mono bakanamenge parapara-koo tee Deevitaꞌke bakanavinge pontoꞌaruꞌnung tang-koo makosi, nka booꞌketa daaꞌaruꞌnaꞌkoo tee eeꞌnara naning meekung masikung eeꞌnoko Kumponing Bauring aaꞌnaꞌ purintoꞌ siraꞌpari otong. Tee niikaang Ovoring Jiisuuꞌ Karistooꞌ. 5 Tee-koo eꞌmanansi kara-okomui-nka deemaruꞌ nantoong amutemuriiꞌ meung-antavaramaꞌnaang tee masikaꞌantavaavaꞌnaang tee. 6 Diiꞌ Roomaꞌnupoong teinge teing ninka nariꞌ otoring, Jiisuuꞌ Karistooꞌke bokururuꞌning. 7 Teeꞌkoo aung karavoto diiꞌanko daariamang, diiꞌ niiꞌning Roomaꞌnupoong-kooning Kumponinge piaaruri bakaning meekupoong deentariiꞌnaang bokururuꞌning ookara-anko. Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ.

Paulaꞌke Roomaꞌnupoong Oo-koo Piavouꞌnaꞌ

8 Tutung tee nkaang Kumponing-koo tampaꞌ tang minkuamaꞌnaang diiꞌ tee-koo baitorarimaung-koo Jiisuuꞌ Karistooꞌke pakumurioꞌ. Ookara kansiꞌke taaravaamaung. 9 Kumponing eeꞌnara ninge mintoompevomaung nkaang domang ootukununge Bauring bakaang doorenang tampara doorearama teie eeꞌnarai masikaꞌantamuko aaꞌdampimang: Ninge diiꞌ tantampimaung nkaang kunsi-koo ookara-koo. 10 Mmauꞌnamuꞌpie kunsimaramaung Kumponing tanaꞌama tauraꞌmuuꞌnaang bakaang piai tampaꞌ tokoonaꞌ nanama beeroꞌdampiiꞌnaang. 11 Aaꞌnaꞌ oo-koo piamoi otong diiꞌ niiꞌning avuavuꞌ Tanuaang Meekung-etaing pareꞌdampiiꞌnaang puring-antaruriaining. 12 Aaꞌnoaing: niiꞌ tee Kumponing nariꞌ masikaꞌantavampimaing nariꞌ kuneꞌmeerira oomeeri domang kuaaꞌantameeriai. 13 Aung diiꞌke noruꞌeriiꞌnaang piamomaang diiꞌke mmaikoriꞌke: Mauꞌmaramaung diiꞌanko beꞌkoo tampaꞌ diiꞌ ninka ning mintoomarako sinang tampaꞌ biꞌuainaꞌ teeꞌ nariꞌ teing niiꞌning Juꞌdeeaing-kooning nauaranko nkoaramanaꞌ, nka eꞌmung doong-koo basinooꞌkoo diiꞌ beeroꞌkoo avoꞌmari oꞌnong. 14 Ning botomuuꞌ ookamuriiꞌ nantoong nauaramaꞌnaang, osikaiaang eeꞌnoko biikoori, norukasiꞌnuka eeꞌnoko amakoori, ookara. 15 Teeꞌkoo aaꞌnaꞌ piamoi otong daankiamaꞌnaang tee tampara doorenang diiꞌ ookara Roomaꞌnupoong-koo.

Ookara Nantoong Teing Kumponing Damaꞌdu Sipauꞌning

16 Ning maiaꞌmoaꞌ tee doorenang tampara siraꞌkoo. Aiꞌ tee tee Kumponing bakaang purintoꞌ domang-anta-koo makosi ookara nantoong masikaꞌantavaavaining, tutuntoma Juꞌnupoong eeꞌnoko napoꞌ teing Juꞌdeeaing. 17 Doorenang tamparai tee sirapoꞌantavuing teeꞌ Kumponinge nantoong nari-antavuriainaꞌ tee ninka nariꞌ. Eeꞌpinaꞌ: Jiisuuꞌ masikaꞌantavaako, tee-koo masikaꞌanta-koo narung-koo koontoꞌnuka tampuriai. Teeꞌ Daari Meekung-koo aaꞌpumanaꞌ,

“Naning tee bakaang masikaꞌanta-koo Kumponing ninka nariꞌ nariari otoaing tee domamparavaing.”
(Abakaka 2:4)

Nantoong Kumponing-koo Ampaꞌoroi Orara Aarumo-koo Kato Biaꞌorouꞌnaꞌ

18 Kumponing bakaang iira tee paning-etaing sirakaꞌpari otong teing-koo Kumponing piavoroaing eeꞌnoko orakaꞌ nkoarimaing-koo, teing kara masikung avoꞌaamaing-koo orakaꞌ nkoaama. 19 Ookara kapooꞌ noruꞌkoo makosi Kumponing-koong siraꞌpari otong teing oreng-koo. Kumponinge baka sirakaꞌantavuuꞌnung teing-koo. 20 Kansiꞌ pupuꞌaruꞌnooꞌketa bakaang iriꞌ oꞌpaaꞌ eeꞌnoko bakaang aarumo deto basi bane oroꞌparavainge, otoremaung. Noruꞌaapeuꞌ kapooꞌnanka nkovuuꞌning ooaama. Tee tee enang makuꞌnaꞌ otoꞌevoroaꞌ tuutunang~koo. 21 Noruꞌnooꞌ tee temuꞌ noruꞌaakoꞌ Kumponing, teka pankaing-antavaavarukoꞌ eeꞌnoko tampara tampaavarukoꞌ tee-koo makosinaꞌ. Teka biikaang noruꞌ toosi-paaꞌ deemparara minkuminku tutumpaakoꞌ daang-koonanka. Bera biikaang domang kanuꞌkoo baraaꞌaruꞌ koontoꞌ mutaanang. 22 Norukasiꞌnuka tamparima baruꞌ kanuꞌnanka deeng-antavarikoꞌ. 23 Paariaakoꞌ Kumponing booꞌpaaꞌ bakaang meenasi teinge baka-oonanka booromaing-pinaꞌ oroꞌnankai aaꞌning-koo: nantoong, bareng, eeꞌnoko kauꞌ karenaumonanka-koo. 24 Teeꞌkoo Kumponinge sipurira ^{▼▼1:24Kumponing bakaang iira eeꞌ oroꞌantavumaung: tauraꞌpuko biikaang aarumo orara biaꞌora taivurimaung. Teka doong asiꞌnaꞌmung kiimata masikung nkavaavaing, Roomaꞌ 2:5 minkuvumanaꞌ.} taraꞌoaruuꞌ orakaꞌ karaaꞌarimanaꞌ tamung danto nkoveeaꞌnaang maarekusinaꞌ bakiaaꞌeema, mono baaꞌpinaꞌ noruꞌeitaaꞌnange. 25 Paariaama Kumponing bakaang kara masikung tositosie teing kapooꞌnanka Kumponinge nkovuruꞌning dootuuꞌaakooꞌ meekeng-pinaꞌ tareaarima, tee eeꞌnara teing nkovuruꞌnung divuꞌaitaaꞌnange, tee biraanke-poꞌnung doong kante otomaung. Eeꞌ, bakei!

26 Teeꞌkoo Kumponinge tamung doong-koo sipuruꞌ aarumo orara maimaiaꞌ karaaꞌkoo. Teing-koo manikuꞌ nampeesi baariꞌauꞌ biiꞌka manikuꞌ naing otoꞌke. 27 Napoꞌ donkaang teeꞌ nariꞌ, manikuꞌ ninka nampeesi sipai biiꞌka donkaang naing bakiaaꞌeekoꞌ maimaiaꞌnaꞌ. Teeꞌnko aarumo orara-koo tee kiimata makosinaꞌ toraꞌpaamaung biiꞌka-koo. 28 Teketaꞌ Kumponing noruꞌkoo kasiaavaruko Kumponinge tamung doonko sipuruꞌ biikaang noruꞌ orara-koo otoꞌkoo, aarumo toosi-paaꞌ ninka. 29 Bakei amutemuriiꞌke maantoꞌuruꞌ, orakaꞌnkoi, orara aarumoi, okoꞌokoi, eeꞌnoko orakaꞌ noruꞌke. Mamairoi maantoꞌke eeꞌnoko tavuꞌnkoi, turang, tositosi, tooꞌdeng; 30 Teing temuriiꞌ tee ukuusi baukonuka, miring orari-antananka, Kumponing-eta kare-nupoong, bauvaupaaꞌ nkonanka, biiꞌka kirokai-nuka, baka daanganuka, daang mataunuka, biumaraang-koo meuntepaꞌnuka, onouropanuka, maraka-anta totoꞌnuka, piaaropanukai, eeꞌnoko amaꞌamaꞌnuka. 32 Kumponing bakaang miruꞌ eeꞌ oroꞌ: Teing teeꞌ nkoariaining tee booroaining. Eeꞌnoko bane tee tee miruꞌ noruꞌai nka tee teinge nkoaamaung, eeꞌnoko bakei keiꞌoromaung niiꞌning oo-koo teeꞌ nariꞌ napoꞌ nkoariko.